موقع جوزة - زوجتي تغيرت بصورة مفاجئة

زوجتي تغيرت بصورة مفاجئة


تاريخ النشر:	2010/02/03 ،15:42

السلام عليكم ورحمة الله وبركاته.. مش عاوز أقول لكم قد إيه أنا سعيد جدا بالموقع ده. وحاسس إن أكيد مشكلتي ليها حل عندكم...؟ لأنها مشكلة معقداني جدا.. وفعلا مش عارف أعمل إيه؟

أنا زوج عندي حاليا 30 سنة، بدأت المشكلة في 2003. كانت زميلتي في العمل، وحبينا بعض وبعد أسبوع واحد فقط من معرفة مشاعر بعضنا، ذهبت إلى مقابلة والدها (لواء شرطة)، رفض وده علشان فرض عليا 30 ألف مهر و15 ألف شبكة وأنا اللي أجهز الشقة كلها. وده طبعا كان مستحيل لأني كنت لسه في بداية حياتي وكل اللي حلتي ساعتها شقتي وعربيتي و15 ألف في البنك.

ومع ذلك رديت عليه وقولتله: أنا ماعنديش مانع بس اديني وقت وأنا أجهز كل طلباتك.. رد عليا وقالي: الخطوبة لا تزيد عن 6 شهور. المهم الموضوع انتهى.. لكن بصراحة البنت كانت بتحبني جدا واتصدمت في أهلها، وعلشان كده قررت أن تستمر معي فترة لحد ما نكون كونا نفسينا ونحقق طلبات سيادة لواء الشرطة.

وفعلا استمرينا سنة ونصف مع بعض دون معرفة أهلها.. كل هدفنا جمع المال وعمل الجمعيات وبعد سنة ونصف فعلا اتقدمتلها تاني وتمت الموافقة بس طبعا بمشاكل فظيعة.. وخناقات على كل شيء وأي شيء.

بس بصراحة البنت كانت واقفة معي تماما ضد أهلها وأخيرا تم الجواز. بس كنت أنا خلاص مش قادر أستحمل أي كلام منهم سواء من أبوها أو من أمها وخصوصا إن في الأواخر ظهرت مشاكل شنيعة جدا وكلام منهم كتير مالوش لازمة خالص وتجريح فيا وفي أهلي كتير، برغم إن مستوانا الاجتماعي والمادي أعلى منهم، ومع ذلك كنت بسمع الكلام ده بكل هدوء وكان كل هدفي إني أحصل على البنت اللي بحبها.

وليلة دخلتي اتفقت مع زوجتي على إنها تسيبني بعيد عن أهلها لمدة أسبوعين أو تلاتة أستريح منهم شوية، ووافقت تماما وكان ردها أنا كمان عاوزة أستريح منهم ومن وجع دماغهم.

طبعا أبوها وأمها لاحظو إني بعيد وخصوصا إن في أول زيارة بعد شهر العسل خليت مراتي تروح لوحدها لأهلها وأنا مارضيتش أروح. فوجئت إنهم ضربوها وطردوها من البيت وخدوا منها مفاتيح شقتهم.. وأمها قالت لها: إفرضي على جوزك إنه ييجي غصب عنه.. ولو مارضاش سيبيلو البيت وتعالي وهو هايجي يتحايل علينا زي "..." علشان نرجعك ليه تاني وهذا الكلام منقول من زوجتي بنفس اللفظ هكذا.

واستمرينا فترة سنتين عايشين في منتهى السعادة دون أدنى خناقة واحنا قاطعين تماما عنهم ولدرجة إن أمها فرضت على كل خيلانها وخالتها المقاطعة تماما مع زوجتي ومع ذلك كنا عايشين في منتهى السعادة اللي في الدنيا.

وأمي وأختي تبنوها تماما وعوضوها تماما عن غياب أهلها وخصوصا إن أيام حمل زوجتي كانت أمي وأختي هما اللي متولينها تماما وذلك دون أدنى اتصال من أي أحد من أهلها برغم إنهم على علم إنها حامل وكان يوصل لنا عن طريق أحد الأصدقاء إن والدها وأمها دائمين الدعوة بفشل هذا الحمل وفشل هذه الجوازة.

والحمد لله ربنا كرمنا بطفلة جميلة في 2007 بعد سنة من الزواج، ومع ذلك ماحدش اتصل من أي من أهلها للطمأنة على زوجتي. ومع ذلك أمي كانت متولياها تماما هي والطفلة بعد الولادة من غسيل وأكل وعناية وكل شيء.

واستمرت العلاقة ممتازة جدا جدا.. كلها حب وتفاهم وحب متبادل جميل جدا بين زوجتي وأمي وأختي. فعلا فعلا بيت في غاية الاستقرار حتى رمضان 2008، عندما جلس معي أبي وأمي وضغطوا عليا إني أحاول استغلال هذا الشهر الكريم في رجوع العلاقات بين زوجتي وأهلها وإنه لا يصح إلا الصحيح.

وفعلا ضغط على زوجتي.. وقولتلها لازم أكمل سعادتك بأن كل شيء يبقى مظبوط في حياتنا وماتحسيش إن فيه أي حاجة نقصاكي خالص وطلبت منها إنها تكلم أهلها تعيد عليهم بمناسبة رمضان وتروح تفطر معاهم في يوم لحد ما العلاقات ترجع.. فأبتدى أنا أرجع بالتدريج وبالتالي الأمور ترجع زي زمان.

ورغم رفضها لهذا الموضوع في البداية لكني قدرت أقنعها ويا ريتني ما أقنعتها.

بدأت إلى حد ما في البداية العلاقة طبيعية إلى أن فوجئت بتغيير شنيع جدا في زوجتي تجاهي وتجاه أهلي من حيث كثرة الخناقات بسبب أنها كل يوم عاوزة تروح لأهلها مع إهمال تام في شئون المنزل وأصبحت بتروح لأهلها أكتر من أربع مرات في الأسبوع الواحد، ده غير خناقات كتير جدا مع أهلي وأمي وأختي بالأخص.

وخناقات أكثر وأكثر وأكثر معايا أنا شخصيا وكلها بسبب أهلها أو أهلي بمعدل خناقتين في الأسبوع الواحد.

ده غير إنها أصبحت حتى تعامل ابنتي معاملة صعبة جدا من ضرب وعدم اهتمام وأيضا ظهر عليها مرض غريب وهو وجع شديد جدا في البول بعد كل لقاء وتم زيارة أكتر من دكتورة نساء وأكثر من دكتورة مسالك بولية وكلهم يؤكدوا عدم وجود أي جوانب مرضية معروفة.

أنا خايف إن تكون أمها عملت لها أي سحر أو أي شي أو أي ربط تجاه هذه العلاقة وخصوصا إن أمها سبق وعملت لها مثل هذه الأعمال.

المشكلة الحالية: وهي أنها في آخر خناقة طلبت مني الطلاق ورفضت طبعا وكان بسبب برضو أهلها ولما تدخلت أمي لتهدئة الموقف. قامت زوجتي بشتم أمي والغلط فيها كتير جدا.

وكانت نتيجة هذا إني انفعلت تماما وكلمت أبوها وقولتله أنا هاجيبلك بنتك لحد ما أعصابها تهدا وفعلا وديتهاله وحاليا بقالي أكثر من شهرين معرفش عنهم حاجة. وبصراحة كرامتي منعاني جدا إني أحقق هدف أمها وأروح لحد عندهم في البيت علشان أرجعها، ده غير إني متأكد تماما إني حتى لو روحت النقاش هايحتد وأكيد هاتقلب بخناقة شنيعة في الآخر، وكمان أنا مش عاوز أدخل أي حد من أهلي وخصوصا بعد الموقف الأخير اللي حصل مابين زوجتي وأمي.

وبصراحة أنا مش عارف أعمل إيه؟ أنا فعلا بحب مراتي وابنتي جدا جدا جدا. بس برضو خايف إني بكون "بنفخ في إربة مقطوعة" وأن خلاص كده مافيش أمل لرجوع زوجتى بتاعة زمان.

حقيقي أنا مش عارف أعمل إيه؟ على العموم أنا متشكر جدا لحسن استماعكم لمشكلتي.
ولو ماعندكوش حل لمشكلتي فمافيش مشكلة. كفاية إني فضفضت معاكو.

ولكم جزيل الشكر والعرفان

******

اذا كنت تعاني او تعانين من مشكلة اجتماعية او عاطفية او زوجية بحاجة لمن يسدي لك النصيحة، ها هو المكان المناسب لطرح القضية على قراء الموقع ولا بد ان تجد مشكلتك حلها الواقعي البعيد عن الفلسفة او الثرثرة الفارغة.
نحن بانتظار رسائلكم على هذا العنوان: editor@jawzah.net لنطلع عليها ثم ننشرها لقرائنا على امل ان يساعدك ذلك.

اضافة تعقيب |

أرسل لصديق |

طباعة